![\"\"](\"https://www.aravot.am/2009/aravot_arm/September/4/p20.jpg\")
Երեկվա «Առավոտում» տեղեկացրել ենք, որ Չինաստանում մեկնարկած շախմատի աշխարհի կանանց երկրորդ թիմային առաջնության մեկնարկային օրը Հայաստան-Հնդկաստան հակամարտությունն ավարտվել է 2:2 հաշվով: Զույգեր կազմած մյուս երկրները խաղացել են այսպես. Լեհաստան-ԱՄՆ՝ 2,5:1,5, Վիետնամ-Վրաստան՝ 1,5:2,5, Չինաստան-2-Չինաստան-1՝ 1:3, Ուկրաինա-Ռուսաստան՝ 2:2:
Երեկ երկրորդ տուրում մեր աղջիկների մրցակիցը ԱՄՆ-ի ընտրանին էր: Ըստ խաղատախտակների, մեր շախմատիստուհիների մրցակիցներն էին. Իրինա Կրուշ-Էլինա Դանիելյան, Լիլիթ Մկրտչյան-Աննա Զատոնսկիխ, Ռուսադան Գոլեթիանի-Նելլի Աղինյան, Սիրանուշ Անդրիասյան-Տաթեւ Աբրահամյան:
Լիլիթ Մկրտչյանը միավորը բաժանեց Աննա Զատոնսկիխի հետ, իսկ Նելլի Աղինյանը 52-րդ քայլում անձնատուր եղավ Ռուսադան Գոլեթիանիին: Էլինան եւ Սիրանուշը դեռ շարունակում էին պայքարը: Նրանք երկուսն էլ խաղատախտակի վրա խաղաքարերի թվային պակասություն ունեին: Մասնագետ չենք, սակայն ստեղծված դիրքերին հետեւելով՝ տպավորությունն այնպիսին էր, որ մեր երկու շախմատիստուհիներն էլ լուրջ պայքար պետք է ծավալեին ոչ-ոքիի հասնելու համար:
Ավելի ուշ հայտնի դարձավ, որ թե Էլինան եւ թե Սիրանուշը պարտվել են: Այսպիսով՝ Հայաստանի կանանց ազգային հավաքականը 0,5:3,5 հաշվով տանուլ տվեց:
