Աբխազիայի պաշտոնական պատվիրակության ներկայացուցիչները հինգշաբթի մեկնել են Վենեսուելայի մայրաքաղաք Կարակաս: «Մեր Աբխազիա» թերթի փոխանցմամբ, աբխազական պատվիրակությունը հենց Վենեսուելայից է սկսելու իր այցը Լատինական Ամերիկայի երկրներ: Համարվում է, որ հատկապես այդ պետություններն են, որ կարող են ճանաչել Աբխազիայի անկախությունը: Նախատեսվում է, որ աբխազները կայցելեն Կուբա եւ Բոլիվիա, իսկ սեպտեմբերի 9-10-ը՝ Նիկարագուա: Սա այն երկիրն է, որ արդեն ճանաչել է Աբխազիայի եւ Հարավային Օսեթիայի անկախությունը:
Նիկարագուա այցի նպատակը, Աբխազիայի ԱԳ նախարար Սերգեյ Շամբայի մատուցմամբ, «այդ բարեկամական երկրի հետ մեր դիվանագիտական հարաբերությունների հետագա զարգացումն է» եւ լատինաամերիկյան մյուս երկրների հետ հարաբերությունների հաստատումը: «Մենք Նիկարագուայի ղեկավարությունից նոտա ենք ստացել, որով նախագահ Դանիել Օրտեգան պատրաստակամություն է հայտնել ընդունել Աբխազիայի պատվիրակությանը»,- հայտարարել է աբխազ նախարարը:
