Չինաստանի Նինբո քաղաքում երեկ մեկնարկեց շախմատի կանանց աշխարհի երկրորդ թիմային առաջնությունը, որին մասնակցելու իրավունք տրվել է 10 լավագույն ազգային հավաքականներին: Նրանց մեջ է նաեւ Հայաստանի կանանց հավաքականը՝ Էլինա Դանիելյան, Լիլիթ Մկրտչյան, Լիլիթ Գալոյան, Նելլի Աղինյան, Սիրանուշ Անդրիասյան կազմով:
Մեկնարկային տուրում վիճակահանությամբ մեր ընտրանու մրցակիցը Հնդկաստանն էր, որոնց պայքարն ավարտվեց 2:2 հաշվով: Մեր աղջիկներից թիմին հաղթական միավորներ բերեցին Լիլիթ Մկրտչյանը եւ Նելլի Աղինյանը, որոնք, համապատասխանաբար, պարտության մատնեցին Տանիա Սաշդեվին եւ Անն Մարիին: Ցավոք, այս հաջողությունը զարգացնել չկարողացան Էլինա Դանիելյանն ու Լիլիթ Գալոյանը: Էլինան համառ պայքարից հետո 62-րդ քայլում պարտվեց Հարիկա Դրոնավալլիին, իսկ Լիլիթ Գալոյանը՝ Իշա Կարավադեին:
