![\"\"](\"https://www.aravot.am/2009/aravot_arm/September/3/p7.jpg\")
Հազարավոր էթնիկ հունգարներ երեկ Սլովակիայում բողոքի ցույց են կազմակերպել՝ ընդդեմ այդ երկրում ընդունված նոր օրենքի, որով սահմանափակվում են Սլովակիայի ազգային փոքրամասնությունների լեզուների օգտագործումը: Համաձայն նոր ընդունված օրենքի, Սլովակիայի հասարակական հիմնարկություններում՝ ներառյալ դպրոցներն ու հիվանդանոցները, խոսակցական եւ գրավոր լեզուն միայն սլովակերենն է: Այդ երկրի իշխանությունների կարծիքով, նոր օրենքը ընդունվել է Եվրամիության չափանիշներին համապատասխան: Հունգարիայի կառավարությունը հայտարարել է, թե այդ հարցում օժանդակություն ստանալու համար կդիմի միջազգային իրավապաշտպան կազմակերպություններին: Սլովակիայում այսօր ապրում են 1,5 միլիոն էթնիկ հունգարներ, ինչը կազմում է այդ երկրի բնակչության 10%-ը միայն: Մի քանի օր առաջ Սլովակիան թույլ չէր տվել Հունգարիայի նախագահ Լասլո Շոյմուին այցելել Սլովակիա՝ հունգար թագավոր Սուրբ Ստեֆանի առաջին հուշարձանի բացման արարողությանը մասնակցելու համար: Սլովակիայի վարչապետ Ռոբերտ Ֆիցոն այն ժամանակ հայտարարել էր, որ նման այցը սադրանք է իր երկրի նկատմամբ: BBC-ի փոխանցմամբ, հաջորդ շաբաթ Հունգարիայի վարչապետը մտադիր է այցելել Սլովակիա՝ փորձելու համար հարթել երկու երկրների միջեւ լարվող հարաբերությունները:
