ԿԱՅԱՆՆԵՐԸ ԴԵՌ ՔԻՉ ԵՆ
Արարատի մարզի Լուսառատ, Արարատ, Նոյակերտ, Ավշար եւ Եղեգնավան համայնքներում այս տարվա մայիս-օգոստոս ամիսներին տեղադրված 12 հակակարկտային կայաններն արդեն երեք անգամ գործարկվել են եւ, ըստ մասնագետների, ապահովել են սպասված արդյունավետությունը՝ կարկուտից պաշտպանում են 1000 հեկտար հողատարածք:
Երեկ միանգամից երեք նախարար՝ տարածքային կառավարման նախարար Արմեն Գեւորգյանը, արտակարգ իրավիճակների նախարար Մհեր Շահգելդյանը եւ գյուղատնտեսության նախարար Գերասիմ Ալավերդյանը Արարատի մարզում էին եւ արդեն գործող կայաններ այցելելուց հետո հայտարարել են, որ մտադիր են կառավարությունում քննարկել եկող տարի եւս 120 հակակարկտային կայան տեղադրելու համար ֆինանսավորում հատկացնելու հարցը: Իսկ ընդհանուր առմամբ կարկուտի դեմ համալիր պայքարի համար պետք է ունենանք 250 հակակարկտային կայան, որը ապահովելու համար կպահանջվի եւս 1-2 տարի:
