Մի քանի ամիս առաջ «Բիլայն» ընկերությունը հեռախոսակայանների թվայնացման նպատակով սկսեց իրականացնել բաժանորդների հեռախոսահամարների վերամիավորումներ: Այսինքն, պահպանվում են բաժանորդների նախկին հեռախոսահամարները, բացառությամբ առաջին 2 նիշի, որը փոփոխվում է: Օրինակ, 25-ով սկսվող հեռախոսահամարները փոխարինվել են 20-ով: Այս հանգամանքը ֆիքսված կապից օգտվող որոշ բաժանորդների շրջանում դժգոհություն է առաջացրել: «Առավոտին» դիմած քաղաքացիներից մեկը՝ պատմաբան Սերգեյ Վարդանյանը, վրդովված էր, որ «Բիլայնի» իրականացրած փոփոխությունների պատճառով ինքը տուժել է: Նրա հավաստմամբ, մի քանի պայմանագիր է ունեցել Հալեպի, Հոլանդիայի եւ Բեյրութի գործընկերների հետ, որոնք, սակայն, պարբերաբար զանգելով իր նախկին հեռախոսահամարին, չեն կարողացել կապվել իր հետ: Արդյունքում որոշ պայմանագրեր խզվել են:
Նշենք, որ բաժանորդի նախկին հեռախոսահամարին զանգելիս՝ զանգը կանոնավոր գնում է, եւ տպավորություն է ստեղծվում, որ պարզապես բաժանորդը զանգին չի պատասխանում: Ս. Վարդանյանի կարծիքով, ընկերությունը պարտավոր էր տեխնիկապես ապահովել, որ տվյալ հեռախոսահամարին զանգողները տեղեկանան կատարված փոփոխության մասին: Թե ինչ կերպ է «Բիլայնը» բաժանորդներին տեղեկացրել կատարվող փոփոխությունների մասին եւ ինչու այդ մասին ավտոմատ սարքերի միջոցով չի տեղեկացվում այն մարդկանց, որոնք, ասենք, զանգում են արտերկրից կամ տեղեկացված չեն նորամուծությանը, ընկերության մամուլի քարտուղար Անուշ Բեղլոյանը պատասխանեց, որ իրենք օրենքով սահմանված ժամկետներում տարբեր լրատվամիջոցներով վերամիավորումների մասին տեղեկացրել են բաժանորդներին, բացի այդ, գրավոր ծանուցել են նաեւ բոլորին անհատապես ու նաեւ զանգել են նրանց: Ինչ վերաբերում է այն բանին, թե ինչու նախկին հեռախոսահամարին զանգելիս չի տեղեկացվում հեռախոսահամարի փոփոխության մասին, Ա. Բեղլոյանը պարզաբանեց, որ ընկերությունը տեխնիկապես նման հնարավորություններ չունի, որպեսզի յուրաքանչյուր բաժանորդի համար ինքնապատասխանիչ տեղադրի, որը զանգողին կուղղորդի: Նրա խոսքերով. «Այս կամ այն բաժանորդը ինքը կարող է իր համար անհատապես ինքնապատասխանիչ դնել, որն էլ կլուծի խնդիրը»:
