Այս նամակի հեղինակը Դիլիջան քաղաքի բնակիչ է եւ պատրաստ է իր նամակում բերված տեղեկությունները ապացուցող տեսաերիզ տրամադրել:
«Հարգարժան «Առավոտ» օրաթերթ:
Երեկ՝ սեպտեմբերի 1-ին, Դիլիջանի Թախտա կոչվող թաղամասի 6-7 տարեկան երեխաների մի մասը դպրոց չի մտել: Երեխաներն ու ծնողները հասել են քաղաքի թիվ 1 դպրոցի բակ եւ տեղում տեղեկացել, որ այն այլեւս ավագ դպրոց է, այնպես որ, փոքրիկները պետք է դառնան վերոհիշյալ թաղամասից 7 եւ 5 կմ հեռավորության վրա գտնվող թիվ 2 կամ թիվ 4 դպրոցների աշակերտներ: Պետական այրերը խոստացել էին տրամադրել դպրոցական ավտոբուս, որը սեպտեմբերի 1-ին չկար: Իսկ եթե լինի էլ, ծնողների մտահոգությունը չի վերանա, քանի որ ձմռան ամիսներին Թախտայի ճանապարհները գրեթե միշտ սառցակալած վիճակում են:
Սեպտեմբերի 1-ին անակնկալի եկած ծնողները փորձել են քաղաքի եւ մարզի ղեկավարներից որոշակի պարզաբանումներ ստանալ, սակայն նրանք անսալով ՀՀ վարչապետի հորդորին, զբաղված են եղել քաղաքի թիվ 2 դպրոցում Գիտելիքի օրը նշելու գործով եւ անգամ քաղաքապետարանում հավաքված բողոքավորների մասին լսելուց հետո էլ չեն փորձել հանդիպել նրանց»:
