![\"\"](\"https://www.aravot.am/2009/aravot_arm/September/2/p11.jpg\")
Սեպտեմբերի 1-ին Կապանի թիվ 3 միջնակարգ դպրոցի համար կրկնակի տոն էր՝ բացվեց հիմնանորոգված հանրակրթական դպրոցը, ներկա էին ՀՀ նախագահ Սերժ Սարգսյանը, ԿԳ նախարար Արմեն Աշոտյանը եւ թիվ 3 դպրոցի շրջանավարտ, բարերար Սերգեյ Համբարձումյանը, ում ներդրումներով էլ հիմնանորոգվել է կրթօջախը:
1949 թվականին հիմնադրված եւ ռուսաց լեզվով դասավանդվող կրթօջախը 1988 թվականին դարձել է մայրենի լեզվով ուսուցմամբ դպրոց: 2009 թվականի ապրիլ-օգոստոս ամիսներին Սերգեյ Համբարձումյանի անձնական ներդրումների շնորհիվ 316 միլիոն դրամի շինարարական աշխատանքներ են իրականացվել դպրոցում եւ այն դարձել է եվրոպական չափանիշներին համապատասխան ժամանակակից կրթօջախ: Ամբողջովին վերակառուցվել, հիմնանորոգվել են սանհանգույցները, ներքին հարդարման աշխատանքներ են արվել, նորացվել է գույքը, դպրոցը կահավորվել է աշակերտական նոր սեղան-աթոռներով, ապահովվել համակարգիչներով, էլեկտրոնային գրատախտակներով: Հիմնանորոգվել են ջրամատակարարման եւ ջեռուցման համակարգերը, վերանորոգվել է մարզադահլիճը եւ այլն:
![\"\"](\"https://www.aravot.am/2009/aravot_arm/September/2/p14.jpg\")
Դպրոցի տնօրեն Էդիկ Բեգլարյանի խոսքերով, այս ուստարում ավելացել է աշակերտների հոսքը: Նոր ուսումնական տարում դպրոց է հաճախել 510 աշակերտ, նախորդ տարի այստեղ սովորողների թիվը 417 էր:
Նոր ուսումնական տարվա մեկնարկի եւ Գիտելիքի օրվա կապակցությամբ շնորհավորական խոսքերով հանդես եկան հյուրերը, բարերարն ու մարզպետը: ՀՀ նախագահ Սերժ Սարգսյանը նշեց, որ յուրաքանչյուր պետություն պարտավոր է ապահովել իր երիտասարդ սերնդի կրթությանն առնչվող բոլոր խնդիրները: Սակայն այս ոլորտում ներդրված 100-ավոր միլիոններն էլ քիչ են լինում լուծել բոլոր այդ հիմնահարցերը եւ այստեղ է անհրաժեշտություն առաջանում այսպիսի բարերարների, որոնք իրենց միջոցները չեն խնայում դպրոցին օգտակար լինելու համար: ՀՀ նախագահը լաբորատոր սարքավորումներ նվիրաբերեց հիմնանորոգված կրթօջախին: Կապանի թիվ 3 դպրոցի շրջանավարտ, բարերար Սերգեյ Համբարձումյանը դպրոցականներին շնորհավորեց նոր ուսումնական տարվա առաջին օրվա կապակցությամբ եւ կոչ արեց բոլոր այն շրջանավարտներին, որոնք ունեն հնարավորություն՝ չվարանեն եւ հետեւեն իր օրինակին:
Սյունիքի մարզպետի 2009 թվականի սեպտեմբերի 1-ի որոշումով Սյունիքի մարզում սոցիալ-տնտեսական հիմնախնդիրների լուծման ու զարգացման, կրթության եւ մշակույթի բնագավառներում ունեցած անձնական ներդրումների, իրականացրած բարեգործական ձեռնարկումների համար պատվավոր սյունեցու կոչում շնորհվեց եւ «Ակսել Բակունց» հուշամեդալով պարգեւատրվեց Կապանի թիվ 3 միջնակարգ դպրոցի շրջանավարտ, բարերար եւ գործարար Սերգեյ Համբարձումյանը:
