![\"\"](\"https://www.aravot.am/2009/aravot_arm/September/2/p4.jpg\")
Երեկ Ինգուշեթիայի հյուսիսում, Մոզդոկ-Թբիլիսի մայրուղային գազամուղում տեղի ունեցած վթարը չի ազդել Վրաստանի տարածքով Հայաստան մատակարարվող ռուսաստանյան գազի տարանցման վրա: Հղում անելով «Ռիա Նովոստիին», «Արմենպրեսը» տեղեկացնում է, որ այդ մասին հավաստիացրել է Վրաստանի նավթի եւ գազի կորպորացիայի մամուլի ծառայության ներկայացուցիչը:
«Ճեղքվածքը տեղի է ունեցել 700 միլիմետրանոց գազամուղում: Դրա հետեւանքով հրդեհ է բռնկվել: Ներկայումս Վրաստանը գազ չի ստանում Ռուսաստանից, իսկ Հայաստան գազի տարանցումն իրականացվում է 1200 միլիմետրանոց գազամուղով: Համապատասխանաբար, Հայաստան գազի տարանցման հետ կապված խնդիր չկա»,- ասել է գործակալության զրուցակիցը:
Ներկայումս գազամուղում բռնկված հրդեհը մարվել է, եւ գազագործները ձեռնամուխ են եղել վթարային-վերականգնողական աշխատանքներին:
Ըստ նախնական տվյալների՝ գազամուղի ճեղքվածքը տեղի է ունեցել տեխնիկական պատճառներով:
