Երեկ Իսրայելի օդուժը մի շարք հարվածներ է հասցրել Գազայի հատվածին, որի արդյունքում զոհվել են ոչ պակաս, քան 4 եւ վիրավորվել 3 պաղեստինցիներ: Ըստ newsru.com-ի, ինքնաթիռները գնդակոծել են նաեւ Ռաֆահ քաղաքի մոտ գտնվող թունելները, որոնցով, ըստ Իսրայելի, պաղեստինցիները անօրինական զենք են տեղափոխում Եգիպտոսից: Այդպիսով, Իսրայելը պատասխանել է երկուշաբթի օրը իր տարածքի վրա տեղացած հրաձգային հարվածներին, որոնց հետեւանքով վիրավորվել է մեկ զինծառայող: Ավելի վաղ իսրայելյան պահակախումբը կրակ է բացել արգելված գոտում գտնվող պաղեստինցիների վրա եւ սպանել 20 տարեկան մի արաբի, եւս մեկը վիրավորվել է: Պաղեստինյան կողմը պնդում է, որ տուժածները սովորական ֆերմերներ էին, իսկ ահա իսրայելցի զինվորականները նշում են, որ կասկածելի երիտասարդները չեն կանգնել նախազգուշական կրակոցների ժամանակ, որից հետո որոշում է ընդունվել նրանց ոչնչացնել: Վերջին շրջանում իրավիճակը Գազայի հատվածում համեմատաբար հանգիստ էր, սակայն դիտորդները կանխատեսում են, որ հարաբերական խաղաղությունը երկար չի տեւի:
