«Առավոտը» տեղեկացրել է, որ 2006 թվականին սկսվել է Արագածոտնի մարզում գտնվող, 11-13-րդ դարերում կառուցված Դաշտադեմի ամրոցը վերականգնելու ծրագիր, որը, սակայն, կարող է չիրականացվել այն պարզ պատճառով, որ նախորդ դարասկզբին ամրոցի տարածքում բնակություն է հաստատել Արեւմտյան Հայաստանից բռնագաղթած ութ ընտանիք: Եվ ահա, ինչպես տեղեկացանք Արագածոտնի մարզպետարանից, Դաշտադեմի ամրոցում կշարունակվեն վերականգնման աշխատանքները: Ըստ մարզպետարանի, ամրոցի վերականգնման ծրագրով լուծվելու են նաեւ բնակիչների վերաբնակեցման, Դաշտադեմ գյուղի գազիֆիկացման հարցերը, սոցիալական այլ խնդիրներ:
Դաշտադեմի եկեղեցին եւ ողջ համալիրը հայ ճարտարապետության եզակի նմուշ են եւ գտնվելով մայրաքաղաքից ոչ հեռու՝ Թալին-Քարակերտ միջպետական ճանապարհի հարեւանությամբ, կարող են դառնալ զբոսաշրջության զարգացմանը նպաստող գործոն: Հիշեցնենք, որ ամրոցի վերանորոգման ծրագրի արժեքը 500 միլիոն դրամ է: Առայսօր կատարվել է մոտ 270 միլիոն դրամի աշխատանք:
