ՀՀ Ազգային անվտանգության ծառայության պետ Գորիկ Հակոբյանն առաջիկայում հրաժեշտ է տալու իր պաշտոնին: NEWS.am-ի տեղեկություններով՝ Հակոբյանին ուղարկելու են թոշակի: Իսկ ԱԱԾ նոր պետի պաշտոնում, ըստ աղբյուրի, շրջանառվում է երկու թեկնածուի անուն: Նախապես նշվում էր, որ ԱԱԾ պետ կարող է նշանակվել ծառայության պետի նախկին տեղակալ, մի քանի տարի առաջ պաշտոնից ազատված Գրիգորի Հարությունյանը, ինչին, սակայն, դեմ է Սերժ Սարգսյանը:
NEWS.am-ի մատուցմամբ, սրա պատճառն այն է, որ Գ. Հարությունյանը լուրջ տնտեսական շահեր ունի Ռոբերտ Քոչարյանի հետ՝ շինարարության ոլորտում, իսկ նման կապերը կարող են լուրջ խնդիրներ հարուցել Սերժ Սարգսյանի համար:
Ամենայն հավանականությամբ, ԱԱԾ պետի պաշտոնում կնշանակվի ներկայումս ԱԱԾ պետի տեղակալի պաշտոնը զբաղեցնող Հրաչյա Հարությունյանը: Վերջինս թեեւ համարվում է Քոչարյանի կադրը, բայց կարողացել է ընդհանուր լեզու գտնել Սերժ Սարգսյանի հետ:
