ՌԴ առաջին փոխվարչապետ Իգոր Շուվալովը հայտարարել է ռուսաստանյան տնտեսության աճի վերականգնման մասին: Ըստ lenta.ru-ի, Շուվալովը նշել է, որ պետք է առնվազն երեք ամիս հետեւել՝ արդյոք այդ դրական միտումները վերականգնվելո՞ւ են: ՌԴ վիճպետկոմի նախնական տվյալներով, 2009-ի երկրորդ եռամսյակում ՀՆԱ-ի ծավալները կրճատվել են 10,9%-ով՝ նախորդ տարվա նույն ժամանակահատվածի համեմատությամբ, սակայն այս տարվա առաջին եռամսյակի համեմատությամբ նկատվում է 7,5%-անոց աճ: Ավելի վաղ Merill Lynch ներդրումային բանկը, հիմնվելով իր տվյալների վրա, հայտարարել է, որ այդ ժամանակահատվածում տեղի է ունենում ռուսաստանյան տնտեսության վերականգնում, իսկ 2010-ին սկսվելու է աճ, որը կազմելու է 2,4%:
Օգոստոսի սկզբին ճգնաժամից դուրս գալու մասին հայտարարել են Ճապոնիայի, Գերմանիայի, Ֆրանսիայի եւ Հոնկոնգի կառավարությունները: Բոլոր հիշատակված երկրներում ՀՆԱ-ն բարձրացել է, ինչը թույլ է տվել որոշ տնտեսագետների հայտարարել, որ տնտեսական անկման ժամանակաշրջանն ավարտվել է:
