Իսրայելի վարչապետ Բենյամին Նեթանյահուն շվեդական կառավարությունից պահանջել է պաշտոնապես դատապարտել շվեդական թերթերից մեկի հրապարակումը, ըստ որի՝ իսրայելական զինվորականները սպանում էին պաղեստինցիներին՝ մարդկային օրգանների փոխպատվաստման համար: BBC-ն հաղորդում է, որ, ըստ այդ թերթի, իսրայելցի զինծառայողները առեւանգում էին պաղեստինցի երիտասարդներին, իսկ այնուհետեւ վերադարձնում նրանց դիակները՝ մասնատված: Իսրայելի կառավարությունը նման հրապարակումները համարում է զայրացուցիչ եւ պահանջում է ոչ թե ներողություն, այլ դատապարտում: Նեթանյահուն այս լուրերի տարածումը համեմատել է միջնադարյան «արյունալի զրպարտությունների» հետ, ըստ որոնց՝ հրեաներն օգտագործում են մանուկների արյունը՝ իրենց կրոնական ծեսերի համար:
Իսրայելի ԱԳ նախարարությունը դադարեցրել է վիզաների տրամադրումը Շվեդիայի բոլոր լրագրողներին: Կառավարությունը հայտարարել է նաեւ, որ համապատասխան դատապարտման բացակայության դեպքում չեղյալ կհայտարարի Իսրայելի արտգործնախարարի այցը Շվեդիա, որը նախատեսված է սեպտեմբերին:
Իր հերթին Շվեդիայի կառավարությունը հրաժարվում է պաշտոնապես դատապարտել հոդվածը՝ վկայակոչելով մամուլի ազատությունը:
