Հայաստանը մտադիր է գումարներ ներգրավել «ԵվրԱզԷՍ»-ի հակաճգնաժամային հիմնադրամից՝ արդյունաբերության, ենթակառուցվածքների եւ տեղեկատվական տեխնոլոգիաների ֆինանսավորման նպատակով:
Ըստ «Մեդիամաքսի», այս մասին տեղեկացրել է ՀՀ ֆինանսների փոխնախարար Վարդան Արամյանը, որը ղեկավարում է «ԵվրԱզԷՍ»-ի հակաճգնաժամային հիմնադրամից ֆինանսավորում ներգրավելու նպատակով ՀՀ կառավարությանն առընթեր ստեղծված աշխատանքային խումբը:
Վ. Արամյանի խոսքերով, խումբն աշխատանքներ է տանում ՀՀ համապատասխան գերատեսչությունների եւ նախարարությունների հետ մանրամասն ծրագրերի մշակման նպատակով, որոնք հիմնադրամին կներկայացվեն աշնանը:
«ԵվրԱզԷՍ»-ի հակաճգնաժամային հիմնադրամի ծավալը կկազմի շուրջ $10 մլրդ: Ֆինանսների փոխնախարարը չի հստակեցրել, թե հատկապես ի՞նչ ծավալի ֆինանսավորում է մտադիր ներգրավել Հայաստանը:
Նշենք, որ հուլիսի 2-ին վարչապետ Տիգրան Սարգսյանը հայտնել էր, որ կառավարությունն արդեն հիմնադրամին ուղղել է 2 հայտ, որ վերաբերում են էներգետիկայի եւ քիմիայի ոլորտներին:
