«ԲԱՐԳԱՎԱՃԸ» ԿԱՐՈՂ Է ԿՏՐՈՒԿ ՔԱՅԼԵՐ ՄՏԱԾԵԼ»

Ըստ ԲՀԿ խմբակցության անդամ Վարդան Բոստանջյանի՝ այն դեպքում, երբ մեր երկրի շահերը «սարսափելի կստորադասվեն»

– Նախկին վարչապետ Հրանտ Բագրատյանը խիստ քննադատական վերաբերմունք ունի այն ամենի հանդեպ, ինչ իրականացնում է Տիգրան Սարգսյանի կառավարությունը, եւ ըստ նախկին վարչապետի՝ այս քաղաքականությունը տնտեսությունը տանում է կործանման: Դուք ի՞նչ կարծիքի եք:

– Ես գերադրական բառեր չեմ կիրառի՝ կործանել եւ այլն, քանի որ հասկանում եմ, որ կատեգորիկ մտքերը երբեւիցե տեղին չեն, որովհետեւ, ըստ երեւույթին, ինչ որ կործանվում է կամ ստեղծվում է, դա միայն Տերը կարող է անել: Իսկ ինչ վերաբերում է կոնկրետ մեր այս կառավարությանը, ապա մեր գործող կառավարությունը չափազանց հետաքրքիր մի կողմ ունի, դա այն է, որ իր կատարած քայլերից եւ գործողություններից բացարձակապես ոչինչ չես նկատում, չես հասկանում: Գուցե մենք չունենք մտային այդ լայն հնարավորությունները՝ հասկանալու, բայց, բոլոր դեպքերում, այն, ինչ մենք տեսնում մենք, այսինքն՝ գրեթե ոչինչ չենք տեսնում, դա նշանակում է, որ, ամենայն հավանականությամբ, չի արվում այն, ինչ կուզենար հասարակ մահկանացուն:

– Սակայն «Բարգավաճ Հայաստանը» նույն այդ կառավարության մաս է, այսինքն՝ դուք կիսում եք կառավարության գործողության ծրագիրը, ըստ էության, դուք համատեղ, կոալիցիայի կազմում իրականացնում եք նույն ծրագիրը, որը, եթե Ձեզ ճիշտ հասկացա, չի կատարվում: Ուրեմն ԲՀԿ-ն, որպես իշխանության մաս, ինչպե՞ս է դրսեւորում իր մասնակցությունն այդ կառավարության կազմում:

– Մաս ենք կազմում եւ այլն, ես, իհարկե, երբեւիցե այդ բառերը չէի օգտագործի, որովհետեւ հասկանում եմ, որ դա որոշակի թղթային հրապարակավ արտահայտած դրսեւորում է: Բայց կարողանում եմ հասկանալ, որ կոորդինացվածությունը գտնվում է շատ ոչ բարձր մակարդակի վրա, որի պարագայում կարող ենք ենթադրել, որ շատ հարաբերական է մաս կազմելը թե կառավարությանը, թե օրենսդիր իշխանությանը: Այս առումով, փաստորեն, պատասխանատվության ինստիտուտը շուտափույթ հնարավոր է դառնում մի կետից տեղաշարժել մի այլ տեղ՝ նայած ով ավելի շատ ձայն է հանում: Իսկ հասարակական ընկալման առումով՝ հայտնի է, որ միշտ էլ հասարակությունը հակված է եղել լսել եւ ընկալել այն բառերը, ինչ որ իրեն մատուցում են: Եվ այդ մատուցածը իրականությանը երբեւիցե չի համապատասխանում: Որքան էլ ես, իբր, խառը խոսեցի, բայց խառը չեմ խոսում, ես ասում եմ իմ մտքերը: Պատասխանատվության ինստիտուտը պարզապես բառ չի, այն պետք է առարկայանա, նյութականանա, եւ ինքս, որպես ոչ վատ օրենսդիր, հասկանում եմ, որ ՀՀ ամբողջ օրենսդրությունը, մեր բոլոր օրենքները պատասխանատվության գրեթե ոչ մի նշույլ չեն պարունակում: Ոչ ոք պատասխանատվություն չի կրում ոչ մի բանի համար: Ես նկատի ունեմ ոչ թե հասարակ քաղաքացիներին, այլ նրանց, որոնք իսկապես պետք է կրեին պատասխանատվություն: Նման ռեժիմում ես մտածում եմ, որ բացառվում են կոորդինացված արդյունավետ գործողությունները:

– Փաստորեն, Դուք ասում եք, որ այսօր կառավարությունում կոորդինացված գործողությունը բացակայում է, ասում եք, թե պատասխանատվությունը հնարավոր է մի կետից տեղափոխել մեկ այլ կետ, արդյոք նկատի ունեք, որ ԲՀԿ-ն կվերանայի՞ իր անդամությունը կոալիցիային, քանի որ գոհ չէ պատասխանատվության իր չափից:

– Մեկ այլ առիթով հենց ձեզ հետ զրույցում ես բարձրաձայնել եմ, որ ոչինչ անհնարին չէ: Միաժամանակ, ԲՀԿ-ին նվիրված մարդ լինելով հանդերձ՝ չեմ տիրապետում այն ամենին, ինչը կարող է որոշակի ձեւափոխումներ առաջարկել: Իսկ թե ուրիշ ի՞նչ զարգացումներ հետագայում, ինչու ոչ՝ նաեւ առաջիկայում կարող են տեղի ունենալ, ես, ցավոք, չեմ կարող պատասխանել:

– «Բարգավաճը» չորս նախարարական պորտֆել ունի: Այդքանը ձեզ չի՞ բավարարում, եւ դուք ուզում եք ունենալ ամբո՞ղջ կառավարությունը՝ փաթեթով:

– Ընդհանուր առմամբ, ֆորմալ առումով դա այդպես է լինում՝ ընդհանրապես: Բայց դուք էլ հասկանում եք, որ նման բան որեւէ մեկը թույլ չի տա:

– Այսինքն՝ իրոք ուզում եք ողջ կառավարությունը: Ձեր մոտեցումը անչափ նման է այն մոտեցումներին, որոնք ՀՅԴ-ն դրսեւորում էր կոալիցիայի կազմում եղած ժամանակ: Եվ, եթե ինչպես ասում եք, այլ բան ձեզ թույլ չեն տա, ուրեմն հնարավո՞ր է՝ կրկնեք Դաշնակցության անցած ուղին եւ դառնաք ընդդիմություն:

– Ներկա պահին նման միտք չկա, բայց ցանկացած պարագայում հնարավոր է ամեն ինչ, որովհետեւ ցանկացած բաժակ, որքան էլ այն մեծ լինի, որքան էլ նրա մեջ ջուրը կաթ-կաթ լցվի, ամեն դեպքում լցվում է: Հիմա այդպես չի, որ նման միտումներ մեզ մոտ նկատվում են, բայց ինչ կարող եմ ասել, գուցե եւ բաժակը լցվի հանկարծ:

– Ի՞նչը կարող է լուրջ ազդակ դառնալ, որ ԲՀԿ-ն դառնա ընդդիմություն՝ տնտեսությո՞ւնը, արտաքին իրավիճա՞կը, Ղարաբա՞ղը, Ռոբերտ Քոչարյանի ակտիվանա՞լը:

– Այդ առանձին պահերը, որ դուք նշում եք, ես չեմ ուզում հիմք ընդունել ԲՀԿ-ի կեցվածքը փոխելու առումով: Ես հասկանում եմ այսպես. ԲՀԿ-ն կարող է կտրուկ քայլեր մտածել, երբ որ մեր երկրի շահերը սարսափելի ստորադասվում են, մեր երկրի բարեկեցությունը վտանգվում է: Այսօր մենք տեսնում ենք, որ համամարդկային արժեքների դաշտից հեռանում ենք: Նման իրավիճակում ոչ միայն ԲՀԿ-ն, այլեւ ցանկացած խումբ կամ միություն պետք է իր համապատասխան կեցվածքն ընդունի:

– Հնարավո՞ր եք համարում արտահերթ ընտրությունները:

– Ինչու՝ ոչ:

– Ես վերացական չեմ հարցնում, այլ՝ կոնկրետ, որքանո՞վ է իրական արտահերթ իրավիճակն առաջիկայում:

– Գոնե այս պահի դրությամբ դրա ռեալության մասին չեմ կարող բան ասել, բայց մեր իրավիճակում գտնվող երկրի համար բացառված չէ, որ հենց վաղը մենք ռեալ խոսենք արտահերթ ընտրությունների մասին: