Ամերիկայի հայկական ազգային կոմիտեի նախագահ Քեն Խաչիկյանը նամակ է հղել Միացյալ Նահանգների պետքարտուղար Հիլարի Քլինթոնին։ Օգոստոսի 20-ին Քլինթոնին ուղարկված 4 էջանոց նամակում Քեն Խաչիկյանը արտացոլել է հայկական համայնքի մտահոգությունը ԵԱՀԿ Մինսկի խմբի ամերիկացի համանախագահ Մեթյու Բրայզայի՝ վերջերս արած «Լեռնային Ղարաբաղի եւ Հայաստանի Հանրապետության վերաբերյալ կողմնապահ հայտարարությունների շուրջ»։ Այս մասին գրում է tert.am-ը՝ վկայակոչելով asbarez.com կայքը։ Մասնավորապես, Հիլարի Քլինթոնին հասցեագրված նամակում պարոն Խաչիկյանը մեջբերել է Մեթյու Բրայզայի վերջերս կատարած «անարդար, ոչ ճշգրիտ եւ հակասական հայտարարությունները»՝ կարծիք հայտնելով, որ դիվանագետի գործողություններն արտացոլում են ԱՄՆ վարչակազմի քաղաքական ուղեգծի տապալումը: Վարչակազմը, ի կատար չածելով ամերիկահայերին տված մի շարք խոստումները, այժմ հմտորեն խուսափում է կյանքի կոչել հայկական հարցերի վերաբերյալ որոշումները։ Նամակում, մասնավորապես, Քեն Խաչիկյանն ընդգծել է. «Այսօր՝ Օբամա-Բայդեն վարչակազմի աշխատանքի մեկնարկից 7 ամիս անց, մենք լրջորեն մտահոգված ենք, որ այս վարչակազմը հրաժարվել է իր պարտականություններից՝ արտաքին քաղաքականությունում արդյունավետ կերպով կյանքի կոչելով Հայաստանի վերաբերյալ ամեն մի որոշում այնպես, ինչպես թելադրում է Թուրքիան՝ չհետեւելով բարոյականության եւ ժողովրդավարության այն հիմնարար սկզբունքներին, որոնք դուք՝ նախագահ Օբաման եւ փոխնախագահ Բայդենը միանշանակ քարոզել եք նախորդ տարի կայացած ձեր նախագահական քարոզարշավների ընթացքում»։
