Վայոց ձորի մարզպետարանում քննարկվել է մարզում ջրային տնտեսության համակարգում արված ներդրումների ու կատարված աշխատանքների գնահատման հարցը ու պարզվել, որ խնդիրները շատ են: Ըստ մարզպետարանից ստացած տեղեկությունների, Ազատեկ համայնքի ոռոգելի ջրատարը, Շատին համայնքի դպրոցամերձ տարածքների ոռոգման ցանցը թերություններ ունեն: Ողջ աշխարհից շախմատիստների հյուրընկալած առողջարանային Ջերմուկ քաղաքի կոյուղին մաքրման կայան չունի եւ հարկ է կառուցել, Ելփին համայնքի փոքր ջրամբարում պետք է հակաֆիլտրացիոն աշխատանքներ իրականացնել: Շատին, Գետափ, Եղեգնաձոր, Մալիշկա, Նոր Ազնաբերդ, Գոմք համայնքների խմելու ջրի ներքին ցանցերը անմխիթար վիճակում են: Նորոգման կարիք են զգում նաեւ Հերհեր, Թառաթումբ եւ այլ համայնքների խմելու ջրի ներքին ցանցերը:
Ջրային տնտեսության պետական կոմիտեի նախագահ Անդրանիկ Անդրեասյանը վայոցձորցիներին տեղեկացրել է, որ Շատին, Գետափ, Եղեգնաձոր, Մալիշկա համայնքների խմելու ջրի ներքին ցանցերի վերանորոգման աշխատանքների ֆինանսական հաշվարկները պատրաստ են եւ շուտով կհայտարարվեն մրցույթները:
Եղեգնաձորի քաղաքապետ Սիրեկան Բաբայանը Ջրային տնտեսության պետական կոմիտեի նախագահին բողոքել է, թե քաղաքի խմելու ջրի ներքին ցանցի վերանորոգման աշխատանքների ավարտից հետո փողոցների ասֆալտային հատվածները բերված չեն նախկին տեսքին: Եվ ճանապարհային ոստիկանների աշխատանքը անձամբ կարգավորելու վարչապետի օրինակով՝ Ջրային տնտեսության պետական կոմիտեի նախագահն է տեղում հանձնարարություններ տվել:
