Երեկ Հայաստանի բռնցքամարտի երիտասարդական հավաքականը Լեհաստանի Շչենցին քաղաքում շարունակվող Եվրոպայի 21-րդ առաջնությունում եւս երկու կորուստ տվեց: Եվ երկու դեպքում էլ մեր տղաների առջեւ դեպի մեդալ տանող ճանապարհը փակեցին Բելառուսի ներկայացուցիչները:
Նախ մինչեւ 69 կգ քաշային կարգում հանդես եկող Հարություն Աբրահամյանը քառորդ եզրափակիչում միավորների 1:3 տարբերությամբ տանուլ տվեց Ալեքսանդր Գրիգորչուկին, ապա նույն ճակատագրին արժանացավ 91 կգ քաշային Ազատ Դավթյանը, որին այս առաջնությունում մրցանակակիր դառնալու բացառիկ հնարավորություն էր ընձեռվել: Պայքարի մեջ ներգրավվելով միայն 1/4 եզրափակիչից՝ Ազատից պահանջվում էր ընդամենը մեկ հաղթանակ տանել, եւ առնվազն բրոնզե մեդալն ապահովված էր լինելու: Սակայն հայ բռնցքամարտիկն ի վիճակի չեղավ այդ քայլն էլ կատարել՝ միավորներով (0:2) զիջելով Վլադիսլավ Կուպցովին:
Ուշ երեկոյան քառորդ եզրափակիչում ռինգ էր մտնելու մեր վերջին ներկայացուցիչը՝ +91 կգ քաշային Հովհաննես Օհանյանը:
