![\"\"](\"https://www.aravot.am/2009/aravot_arm/August/21/p14.jpg\")
Ինչպես հաղորդում է 7or.am-ը՝ վկայակոչելով «AFP» գործակալությունը, օգոստոսի 19-ին Բաղդադում տեղի ունեցած ահաբեկչական գործողությունների հետեւանքով զոհվել է առնվազն 95 մարդ, եւս 563 մարդ ստացել է վնասվածք։ Այդ օրը Իրաքի մայրաքաղաքում 10 պայթյուն է տեղի ունեցել։ Ամենամեծ ավերածություններն առաջացրել են ֆինանսների եւ արտգործնախարարության շենքերի մոտ տեղակայված բեռնատարների պայթյունները։ Պայթուցիկների հիմնական մասը դրված է եղել կառավարական շենքերի մոտ տեղակայված մեքենաների մեջ։ Բացի այս պայթյուններից՝ Բաղդադը միաժամանակ ռմբակոծության է ենթարկվել ականանետով։ Քաղաքում երթեւեկությունը խախտվել է, ինչի հետեւանքով չի հաջողվում տուժածներին ժամանակին հասցնել հիվանդանոցներ։ Վերջին կես տարվա ընթացքում սա ամենախոշոր ահաբեկչական գործողությունն էր Իրաքում։ Ֆրանսիայի արտգործնախարար Բերնար Քուշները հայտարարել է, որ ահաբեկիչները որպես թիրախ ընտրել են այն կառույցները, որոնք խորհրդանշում են Իրաքի անկախությունը։ Մի շարք պայթյուններ ուղղված են եղել նաեւ շիա ուխտագնացների դեմ։ Օգոստոսի 21-ի գիշերը մահմեդականների մոտ սկսվում է սուրբ Ռամադան ամիսը, եւ բռնությունները սաստկանում են հատկապես Ռամադանից առաջ եւ հետո։
