Քաղաքապետը պատժել է

Երեւանի քաղաքապետ Գագիկ Բեգլարյանը նկատողություն է արել Կենտրոն վարչական շրջանի ղեկավարի տեղակալին՝ անբարեխիղճ աշխատանքի համար: «Այն պաշտոնյան, ով չի աշխատում հօգուտ Երեւանի եւ նրա բնակչի, չպետք է շարունակի պաշտոնավարել»,- հայտարարել է քաղաքապետը: Իսկ թե հատկապես որ ոլորտում ցուցաբերած անբարեխղճության համար է պատժվել Կենտրոնի պաշտոնյան, մեզ պարզել չհաջողվեց, քանի որ քաղաքապետարանի լրատվական ծառայությունից «Առավոտին» ասացին, որ իրենք էլ տեղյակ չեն:

Բացի այդ, Գ. Բեգլարյանը հանձնարարել է Երեւանի վարչական շրջանների ղեկավարներին՝ միջոցներ ձեռնարկել ընդլայնելու իրենց ենթակայությամբ գործող ստորաբաժանումներն ու Երեւանի քաղաքապետարանի համապատասխան վարչությունների համագործակցությունը, քանի որ, ըստ քաղաքապետի, վարչական շրջանների ղեկավար կազմը քիչ է տեղեկացված Երեւանի քաղաքապետարանի կողմից իրականացվող աշխատանքների մասին:

Պարոն Բեգլարյանը կարեւորել է նաեւ այն, որ քաղաքապետարանում տրված յուրաքանչյուր հանձնարարական վարչական շրջաններում դառնա աշխատանքային ընթացակարգ, որին պետք է հետեւեն Երեւանի վարչական միավորների ղեկավարներն ու քաղաքապետարանի ղեկավար կազմը՝ անձամբ: