Ջերմուկում ընթացող շախմատի ՖԻԴԵ-ի «Մեծ մրցանակի» հինգերորդ խաղարկությունում, որին տրվել է աշխարհի 9-րդ չեմպիոն «Տիգրան Պետրոսյանի հուշամրցաշար» անունը, այսօր երկրորդ եւ վերջին հանգստյան օրն է հայտարարված:
![\"\"](\"https://www.aravot.am/2009/aravot_arm/August/19/p17.jpg\")
Վասիլի Իվանչուկ:
![\"\"](\"https://www.aravot.am/2009/aravot_arm/August/19/p18.jpg\")
Սերգեյ Կարյակինը իր կնոջ՝ Եկատերինայի հետ վայելում է
Ջերմուկի բնությունը:
![\"\"](\"https://www.aravot.am/2009/aravot_arm/August/19/p19.jpg\")
Արոնյանի մտերիմ ընկեր, օլիմպիական չեմպիոն
Գաբրիել Սարգսյանը եւ ընկերուհին՝ Արիանան:
![\"\"](\"https://www.aravot.am/2009/aravot_arm/August/19/p20.jpg\")
Պետեր Լեկո-Սոֆիա Պետրոսյան-Լեկո անբաժան ընտանիքը:
Մեր ժամանակների 14 ուժեղագույն գրոսմայստերների պայքարն անցել է մրցաշարի մարաթոնյան ճանապարհի երկու-երրորդը: Այսուհետեւ յուրաքանչյուր պարտիայի, վաստակած կամ կորցրած միավորի գինն անհամեմատ ավելի բարձր է լինելու:
Երեկ շախմատիստները հանդես էին գալիս 9-րդ տուրում: Միմյանց դեմ խաղում էին Էլյանովն ու Իվանչուկը, Կամսկին ու Լեկոն, Կասիմջանովն ու Չեպարինովը, Բակրոն ու Արոնյանը, Գելֆանդն ու Ալեքսեեւը, Կարյակինն ու Ինարկիեւը, Յակովենկոն ու Հակոբյանը:
Արդեն ասել ենք, որ այս գրոսմայստերներից յուրաքանչյուրն ի վիճակի է խաղատախտակի առջեւ շախմատային հրաշքներ գործելու ու այդ իմաստով անկանխատեսելի է: Դրա լավագույն օրինակը տալիս է իսկապես շախմատային հանճար՝ ուկրաինացի Վասիլի Իվանչուկը, որի խաղը վերջին ժամանակներս վայրիվերումներով է ընթանում: Նա մի խոշորագույն մրցաշարում կարող է փայլուն հաղթանակ տանել, սակայն մի քանի օր անց՝ դժգույն մրցելույթով եզրափակել հսկաների մեկ այլ մրցամարտի մրցաշարային աղյուսակը: Իվանչուկն անկանխատեսելի է նաեւ այստեղ՝ Ջերմուկում: Մեկնարկելով ոչ այնքան հաջող (առաջին երեք պարտիաները նա ավարտեց ոչ-ոքի)՝ եղավ մի պահ, որ ուկրաինացին բավականին ետ էր մնում մրցակիցներից եւ ընթանում էր մրցաշարային աղյուսակի ստորին հորիզոնականներում: Թվում էր, թե այլեւս ամեն բան նրա համար կորսված է: Սակայն 4-8-րդ պարտիաներում տանելով երեք հաղթանակ եւ երկու պարտիայում գրանցելով ոչ-ոքի՝ Վասիլի Իվանչուկը վաստակած միավորներով՝ 5,5, հավասարվեց մինչ այդ միանձնյա առաջատար Պետեր Լեկոյին եւ 8-րդ տուրից հետո լրացուցիչ գործակիցներով շրջանցել էր նրան:
Առայժմ իր վճռորոշ խոսքը չի ասել օլիմպիական չեմպիոն Լեւոն Արոնյանը, որին ընդամենը մեկ միավոր է բաժանում Իվանչուկից եւ Լեկոյից: Սակայն մենք գիտենք ոչ քիչ օրինակներ, երբ Արոնյանը վճռորոշ պահերին արել է անհնարին թվացողը: Դրա համար Լեւոնին մնացել է ընդամենը հինգ տուր, որոնց ընթացքում նա պետք է վաստակի հնարավորին չափ շատ միավոր:
Ջերմուկում չի ստացվում Վլադիմիր Հակոբյանի խաղը, որը մինչեւ երեկ չէր ճաշակել հաղթանակի քաղցրությունը: Ութ պարտիաներից վեցում նա բավարարվել է միավորը մրցակիցների հետ բաժանելով եւ երեք անգամ իրեն պարտված ճանաչել: Հուսանք, որ «Grand Prix»-ի եզրափակիչ հատվածը Հակոբյանի համար ավելի հաջող կընթանա:
Ընտանիքն առաջնային է
Շախմատիստները հետաքրքիր սովորություն ունեն: Նրանք աշխարհի որ ծայրում էլ խաղալու լինեն՝ միայնակ չեն մեկնում: Մարզիչների եւ մարտավկաների ներկայությունը, հասկանալի է, պարտադիր է: Սակայն կա մի չգրված օրենք. որպես կանոն, ընտանիքի անդամներից մեկը կամ կյանքի ընկերուհին մշտապես նրանց կողքին է: Ամենայն հավանականությամբ, այդ ուղեկիցները նրանց ոգեւորում են, հաջողություն բերում:
Ջերմուկն այս առումով բացառություն չէ: Օրինակ, Լեւոն Արոնյանին միշտ ուղեկցում է գեղեցկուհի Արիանան, որը, որքան տեղյակ ենք, ֆիլիպինուհի է: Հունգարացի Պետեր Լեկոն առանց իր տիկնոջ՝ Սոֆիի եւ աներոջ՝ գրոսմայստեր Արշակ Պետրոսյանի, ոտքը, ինչպես ասում են՝ տնից դուրս չի դնում: Այս ավանդույթը, կարծես թե նաեւ ուկրաինացի Սերգեյ Կարյակինի սրտով է: Նա վերջերս է ամուսնացել միջազգային վարպետ Եկատերինա Դոլժիկովայի հետ եւ կարելի է ասել, որ նրանք Ջերմուկում նաեւ իրենց մեղրամիսն են անցկացնում:
