Ռուսաստանի Դաշնության առողջապահության պետական կոմիտեն թույլատրել է սկսել A/H1N1 գրիպի ռուսական պատվաստանյութի բժշկական փորձարկումները: Այս մասին հաղորդում է News.ru լրատվական կայքը՝ հղում անելով առողջապահության պետական կոմիտեի տարածած հաղորդագրությունը: Այս հաղորդագրության մեջ նշված է նաեւ, որ A/H1N1 վարակի դեմ պատվաստանյութ է պատրաստել «Միկրոգեն» գիտաարտադրական ձեռնարկությունը: Ըստ կայքի տեղեկությունների, պանդեմիական վարակի դեմ պատվաստման համար գրանցման գործընթացն արագացվելու է, իսկ հաջորդ քայլը լինելու է այն մարդկանց խմբի ընտրությունը, որն առաջինն է ինքնակամ պատվաստվելու: Հիշեցնենք, որ այս վարակի պատճառով աշխարհում մահացել է ավելի քան 1700 մարդ:
ՀՀ առողջապահության նախարարության ոլորտի պատասխանատուները վստահեցնում են, որ խոզի գրիպը մեր երկիր չի թափանցել, չնայած այն բանին, որ մեր հարեւան 3 պետություններում՝ Վրաստանում, Ադրբեջանում, Թուրքիայում, այդ վարակով մարդիկ են հիվանդացել:
