Առաջիկա 6 ամիսների ընթացքում Հայաստանին ուժեղ երկրաշարժեր չեն սպառնում: Նման եզրահանգման են եկել Սեյսմիկ պաշտպանության ազգային գործակալությունում: Երեկ լրագրողների հետ հանդիպման ժամանակ գործակալության պետ Ալվարո Անտոնյանն ասաց, որ Հայաստանում հնարավոր է օրական բազմաթիվ թույլ երկրաշարժեր լինեն, որոնք զգալի չեն լինի մարդկանց եւ կենդանիների համար: Ա. Անտոնյանի խոսքերով՝ այս տարի երկրակեղեւի ցնցման տեսակետից միակ եւ ուժեղ իրադարձությունը Հայաստանում գրանցվել է հունիսի 18-ին՝ Գառնիում: Ըստ Սեյսմիկ պաշտպանության ազգային գործակալության պետի, ի տարբերություն նախորդ տարիների, 2009 թվականին երկրաշարժեր քիչ են գրանցվել, սակայն հունիսի 18-ի Գառնիի մեկ երկրաշարժը նույնքան էներգիա է անջատել, որքան ողջ 2008 թվականի ընթացքում գրանցված բոլոր երկրաշարժերը:
