Այսօր «Ազգային ժողովի բաց դռներ» ծրագրի շրջանակում Արթո Թունչբոյաջյանը եւ նրա Arminian Navy Band-ը հանդես կգան ԱԺ այգում: Համերգի կազմակերպիչներից Արմինե Անտիկյանը հայտնեց, որ այդկերպ ձեւավորվում է ԱԺ դարպասները հանրության առաջ բացելու գեղեցիկ ավանդույթ. «Ժողովուրդը, որ սովոր է ճաղերի արանքից նայելու այգուն, այժմ հնարավորություն ունի ներս մտնել, զբոսնել ու վայելել: ԱԺ նախագահի կողմից այդ գաղափարը կյանքի կոչելը կարեւոր է նրանով, որ այս նախաձեռնությամբ, փաստորեն, դարպասները բացվում են մշակույթի առաջ»: Ինչ վերաբերում է բոլորի կողմից սիրված ավանգարդ ֆոլք ոճում ստեղծագործող եւ կատարող Արթոյին, նրա հետ հանդիպումը՝ անկախ «ձեւաչափից», միշտ էլ վերածվում է տոնի: Arminian Navy Band-ն էլ, որպես միջազգային երաժշտական լուրջ հայտ ներկայացրած խումբ, ինչ խոսք, վայելում է ինչպես «դրսի», այնպես էլ հայաստանցիների ջերմ համակրանքը:
Երեկ Միստեր Avant-Garde Folk Թունչբոյաջյանը եւ Avant-Gard Folk music Production-ի տնօրեն Արտակ Գեւորգյանը հյուրընկալվեցին «Առավոտում»: Արթոյի հետ զրույցը ոչ միայն երաժշտության, այլեւ հայաստանյան բարքերի մասին էր: Հայաստանի ու հայի պատիվը բարձր պահելու թունչբոյաջյանական մտորումները կարդացեք վաղվա համարում:
