Վրաստանի արտգործնախարարությունը բողոքի նոտա է նախապատրաստում ՌԴ վարչապետ Վլադիմիր Պուտինի Սուխում այցի առնչությամբ: «ԱրմԻնֆոյի» փոխանցմամբ՝ ըստ «Բլաք սի պրեսի», այդ մասին հայտարարել է Վրաստանի փոխարտգործնախարար Ալեքսանդր Նալբանդովը: «Այդ այցը միանգամայն անօրինական է եւ խախտում է միջազգային իրավունքի բոլոր նորմերը: Ամենամոտ ժամանակներս բողոքի նոտան կհանձնվի Վրաստանում Շվեյցարիայի դեսպանությանն առընթեր ՌԴ շահերի սեկցիա: Պատահական չէ, որ Պուտինը Սուխում ժամանեց հենց օգոստոսի 12-ին՝ այն օրը, երբ 2008 թվականին ստորագրվեց հրադադարի շուրջ համաձայնագիր»,- ասել է Նալբանդովը՝ դա համարելով «նպատակաուղղված սադրանք եւ մարտահրավեր ողջ համաշխարհային հանրությանը»:
