ԱՄՆ-ում արդեն փորձարկում են H1N1 վիրուսի դեմ պատվաստանյութը: Ըստ «Ռիա-նովոստիի», «խոզի գրիպի» դեմ փորձարկումները երեկ մեկնարկել են ԱՄՆ-ի բժշկական հաստատություններում եւ կլինիկաներում:
Վարակը կանխելու փորձակումների համար անհրաժեշտ են հազարավոր կամավորներ: Նրանք, ովքեր պատրաստ են պատվաստվելու համար, պետք է պատվաստվեն 21 օրվա տարբերությամբ, որպեսզի հաջորդ ամիս արյան հետազոտությունից պարզվի, թե պատվաստվածի իմունային համակարգը որքանո՞վ է պատրաստ պայքարել վարակի դեմ: Չնայած պատվաստանյութի փորձարկմանը, հոկտեմբերին ԱՄՆ-ում սպասում են «խոզի գրիպի» հերթական բռնկում:
Նշենք, որ աշխարհում, պաշտոնական տեղեկատվության համաձայն, H1N1-ով արդեն վարակվել է 134.503 մարդ, իսկ 816 մարդ մահացել է:
«Խոզի գրիպի» վարակվածության դեպքեր են գրանցվել նաեւ Ռուսաստանում եւ Վրաստանում: Իսկ Հայաստանում վարակվածության դեպքեր չեն եղել:
