Վրաստանի արտգործնախարարությունը մեղադրել է ռուսաստանյան զինվորականներին «նոր տարածքներ զավթելու» մտադրություն ունենալու մեջ:
«Ըստ Վրաստանի ներքին գործերի նախարարության ունեցած տեղեկությունների, 2009 թվականի օգոստոսի 2-ին ռուսաստանյան զինվորականները ներխուժել են Գորիի շրջանի Կվեշի գյուղ եւ, նպատակ ունենալով տեղափոխել այսպես կոչված սահմանը, գյուղի տարածքում հենասյուներ են տեղադրել, ինչը հանդիսանում է ռուսաստանյան զավթիչների կողմից Վրաստանի տարածքի խորք ներթափանցելու փորձ»,- ասվում է Վրաստանի ԱԳ նախարարության տարածած հայտարարության մեջ: Վրաստանի արտաքին գերատեսչությունը «դատապարտում է ռուսաստանյան զինվորականների գործողությունները Կվեշի գյուղում եւ Ռուսաստանին պատասխանատու է համարում հերթական սադրանքի փորձ կատարելու մեջ», հայտնում է Interfax-ը:
