Վերանորոգվում է Ապարանի հիվանդանոցը

Համաշխարհային բանկի 570 միլիոն դրամ ներդրմամբ հունիսի 15-ից սկսվել են Ապարան քաղաքի հիվանդանոցի շենքի հիմնանորոգման աշխատանքները: Շենքը կառուցվել է 1974 թվականին եւ առայսօր շահագործվել առանց լուրջ վերանորոգման: Ինչպես նշեց «Ապարանի բժշկական կենտրոն» ՓԲԸ-ի տնօրեն Հայկ Շմավոնյանը, 60 մահճակալ ունեցող հիվանդանոցը տարեկան ընդունում է մոտ 1300 հիվանդի: Կան անհրաժեշտ բժշկական սարքավորումները, կա բավարար առողջապահական ծառայություններ մատուցելու հնարավորություն, իսկ վերանորոգումից հետո հիվանդանոցը կհամալրվի բժշկական նորագույն տեխնիկայով, որից հետո հիվանդները միայն ծայրահեղ անհրաժեշտության դեպքում կհետազոտվեն եւ կբուժվեն մայրաքաղաքում: Հիվանդանոցն ապահովված է լավագույն բուժաշխատողներով: Եվրոպական չափանիշներով վերանորոգվող այս կառույցը նաեւ հարմարավետ կահավորանք կունենա, կգործի անհատական ջեռուցում, ժամանակակից վերելակ, ամբողջովին կբարեկարգվի շենքի շրջակայքը:

Թեեւ ծրագրի համաձայն շինարարությունը նախատեսված է ավարտել հաջորդ տարի, սակայն շինարարները խոստացել են հիվանդանոցը ապարանցիներին հանձնել այս տարեվերջին: