![\"\"](\"https://www.aravot.am/2009/aravot_arm/July/30/p13.jpg\")
Հուլիսի 28-ին, երեկոյան ժամը 20-ի սահմաններում, Ալավերդի-Վանաձոր մայրուղու Ձորագետ ավանին հարող հատվածը փակ էր: Հորդառատ անձրեւների եւ Դսեղից իջնող ջրագծի խողովակը պայթելու հետեւանքով մայրուղին պատվել էր լեռնային քարերով եւ մինչեւ ժամը 23-ը դարձել անանցանելի ավտոմեքենաների համար: Ինչպես փաստեցին տեղաբնակները, հեղեղը ճանապարհի բանուկ մասը լցրել էր Դսեղ գյուղի մատույցների լեռնային փլվածքներով: Վթարի վայրում հայտնված Ալավերդու ճանապարհային ոստիկան կապիտան Արամը միայնակ աշխատում էր մեղմացնել խցանումները: Այդուհանդերձ ճանապարհի երկու կողմից ավելի քան 100 մետր երկարությամբ խցանումներ էին: Որեւէ մեքենա կամ ուղեւոր չի վնասվել: «Հեղեղատարը փակվել ա, լրիվ տներից հետ լցվել ա, մարդկանց այգիները վնասել ա, փեթակները ջրի տակ ա քաշել, տեսնենք ոնց կլինի»,- իրենց մտահոգություններն էին հայտնում հեղեղի վայրում հայտնված ձորագետցիները: Նրանք տեղեկացրին նաեւ, որ հեղեղի պատճառով վնասվել է ավանի 15 բնակարան:
