Երեկ ՀՀ ոստիկանության պաշտոնական կայքէջը տեղեկացրեց, որ 4 օր առաջ Արամի փողոցում ավազակային հարձակման ենթարկված Չեխիայի Հանրապետության երկու քաղաքացու, ինչպես նաեւ հուլիսի 25-ին Ե. Կողբացի եւ Վ. Սարգսյան փողոցներում ավազակային հարձակման ենթարկված Նիդեռլանդների Թագավորության երկու եւ Արգենտինայի երեք քաղաքացիների գործով ոստիկանության տարբեր ստորաբաժանումների եւ ԱԱԾ աշխատակիցների համատեղ միջոցառումների արդյունքում հուլիսի 27-ին բերման են ենթարկվել 16-ամյա Մկրտիչ Հովսեփյանը, 19-ամյա Հայկ Բուդոյանը եւ նրա կրտսեր եղբայրը` 16-ամյա Վիգեն Բուդոյանը:
Վերջիններս խոստովանել են, որ զբոսաշրջիկների վրա կատարված ավազակային հարձակումները հեղինակել են իրենք:
Ըստ ոստիկանության, Մ. Հովսեփյանի տան խուզարկությամբ հայտնաբերվել եւ առգրավվել է «Մակարով» տեսակի ատրճանակ, իսկ Բուդոյանների բնակարանից հայտնաբերվել են զբոսաշրջիկներին պատկանող «Վիզա Էլեկտրոն» եւ «Մաստեր» քարտեր, անձնագիր, ժամացույցներ, դրամապանակներ, բջջային հեռախոսներ, տարբեր երկրների դրամներ եւ այլն:
Քրեական գործի նախաքննությունը շարունակվում է:
