«Առավոտի» երեկվա համարում «Երբ հողը երկու տեր ունի» հրապարակմամբ անդրադարձել էինք խորհրդային տարիներին այգեգործական հողամասեր ստացած քաղաքացիների խնդրին: Այդ հողամասերից շատերը չեն մշակվել ու արդեն անկախ Հայաստանում հատկացվել են այլ քաղաքացիների: Նույն հողը երկու օրինական տեր ունի: ՀՀ տարածքային կառավարման փոխնախարար Արտաշես Բախշյանը մեզ տեղեկացրել էր, որ ամեն ինչ արվելու է քաղաքացու՝ այգեգործի եւ ոչ թե այգեգործական ընկերության շահերից ելնելով: Երեկ այգեգործական ընկերությունների ղեկավարները Արտաշես Բախշյանի հետ քննարկում էին նույն հարցը:
Նախքան քննարկման գալը նրանք Արտաշես Բախշյանի դեմ բողոք-նամակ էին գրել՝ Բախշյանի հասցեին վիրավորական արտահայտություններով: Քննարկման հենց սկզբում պարզվեց, որ նամակի տակ ստորագրածների մեծ մասը նամակը չի կարդացել: Հետո բոլորը միասին դժգոհություն հայտնեցին մեր «Երբ հողը երկու տեր ունի» հրապարակումից: Նամակի պատմությունը թույլ է տալիս ենթադրել, որ ոչ բոլորն են կարդացել հոդվածը:
Այգեգործական ընկերությունները միասնական տեսակետ չունեն: Օրինակ, «Նոյ» ընկերության ղեկավարը մեկ բան է ուզում՝ եթե խորհրդային տարիներին հողատերը փոխվել է օրենքի սահմաններում, Հայաստանի Հանրապետությունը օրինական համարի փոփոխությունը: Իսկ Մերձավանի այգեգործական ընկերությունը ուզում էր վերականգնել խորհրդային տարիներին ունեցած իրավունքը՝ հնարավորություն ունենալ փոխել հողատիրոջը:
Քննարկման ժամանակ Արտաշես Բախշյանը մեկ անգամ եւս հայտարարեց, որ այգեգործների իրավունքները պաշտպանվելու են, անգամ, եթե այգեգործական ընկերությունները դժգոհեն: Իսկ դժգոհությունը մեկ պատճառ ունի: Խորհրդային տարիներին այգեգործական ընկերությունները իրավունք ունեին այգեգործից վերցնել հողը, եթե վերջինս երկու տարի հողը անմշակ թողներ: Այգեգործական ընկերությունների մի մասը ցանկանում է այսօր էլ նման իրավունք ունենալ: ՀՀ կառավարությունը դեմ է:
Քննարկման արդյունքում կողմերը ընդհանուր լեզու չգտան: Հիշեցնենք, որ Արտաշես Բախշյանը հույս էր հայտնել, թե մինչեւ 2010-ի գարուն հարցը լուծված կլինի:
