Այս տարի Սյունիքի մարզից միասնական քննություն հանձնող 933 աշակերտից 20 միավոր ստացան միայն 8-ը: Երկու «20» գրանցվեց ֆիզիկայից, վեցը՝ անգլերենից, մյուս առարկաներից «20» ստացողներ չեն եղել: «19» ստացողների թիվը հասնում է 43-ի: Ինչպես տեղեկացնում է Սյունիքի մարզպետարանի կրթության, մշակույթի եւ սպորտի վարչության պետ Լյուդվիգ Հարությունյանը, «19» չի եղել գերմաներեն, ընդհանուր պատմություն եւ աշխարհագրություն առարկաներից, «18» հավաքածները 87-ն են: 321 աշակերտ միասնական քննություն հանձնելիս չկարողացավ հավաքել նվազագույն «8» միավորը: Պարոն Հարությունյանը մեզ հետ զրույցում նշեց, որ ինքը դժգոհ չէ քննությունների արդյունքներից, ակտիվությունը մեծ էր: Ըստ նրա՝ ցածր միավորները ոչ այնքան թեստերի բարդության հետեւանք են, որքան թեստերի լրացման համար սահմանված քիչ ժամանակի:
