Նախընտրում են Անթալիան

Որքան էլ ՀՀ կառավարությունը միջոցներ է ծախսում Հայաստանում տուրիզմը զարգացնելու համար, այս տարի տուրիստների թիվը նախորդ տարվա համեմատությամբ ընդամենը 240-ով է ավելացել: «Արմենպրեսի» տեղեկացմամբ, այս ցուցանիշից դժգոհ է նաեւ էկոնոմիկայի նախարարության զբոսաշրջության վարչության պետ Մեխակ Ապրեսյանը: Նա տուրիստների՝ Հայաստան չգալը պայմանավորեց համաշխարհային ճգնաժամով: Հարցին, թե մեր երկրում չափազանց բարձր գները չե՞ն խրտնեցնում զբոսաշրջիկներին, պարոն Ապրեսյանը պատասխանեց. «Բարձր գնի դիմաց բարձր է նաեւ ծառայությունների որակը: Հայաստանում կան վայրեր, որտեղ 6-7 հազար դրամ օրավարձով կարելի է հանգստանալ: Ճիշտ է, այնտեղ շքեղ պայմաններ չեն, սակայն նորմալ հանգիստ ապահովելու համար անհրաժեշտ պայմաններ կան: Իսկ, օրինակ, Աջարիա զբոսաշրջիկներին տանում են նույնիսկ 7 օրը 35 հազար դրամով, բայց երբ փորձում ես պարզել, թե գնի դիմաց ինչ է ստանում զբոսաշրջիկը, տեսնում ես, որ բավական տարրական պայմաններ բացակայում են»:

Ըստ Մ. Ապրեսյանի, բավականին մատչելի են նաեւ տուրգործակալությունների առաջարկած Ղարաբաղի զբոսաշրջային փաթեթները: Նախարարության տվյալներով, այս տարի հայերը նախընտրում են հանգստանալ ավելի շատ Վրաստանում եւ Անթալիայում: