«Ժառանգություն» կուսակցությունը երեկ հանդես է եկել հայտարարությամբ, որտեղ մասնավորապես նշված է, թե շարունակելու են «Նիկոլ Փաշինյանին, ինչպես եւ մյուս քաղբանտարկյալներին կալանքի տակ պահելը համարել իբրեւ երկրի ներսում իշխող խմբավորման կողմից իրականացվող քաղաքական վենդետայի շարունակություն եւ ԵԽԽՎ բանաձեւերի պահանջներն ու Հայաստանի ստանձնած պարտավորությունները չկատարելու փաստ: Նմանապես Արման Բաբաջանյանի՝ օրեցօր ծանրացող առողջական վիճակի նկատմամբ իշխանությունների հանցավոր անտարբերությունն առանձնակի դաժան վերաբերմունքի արտահայտություն է:
«Ժառանգությունը» նաեւ իր մտահոգությունն է հայտնում առ այն, որ իշխանությունն իրեն հլու-հնազանդ ծառայող «արդարադատական» ու իրավապահ համակարգի միջոցով կարող է կալանքի վերցնել նաեւ ԱԺ պատգամավոր Խաչատուր Սուքիասյանին, եթե վերջինս որոշի դուրս գալ ընդհատակից, այն դեպքում, երբ պրն Սուքիասյանին ազատությունից զրկելու իրավական որեւէ հիմք չկա: «Ժառանգությունն» իշխանություններից պահանջում է երկրում առկա բարոյական, սոցիալ-տնտեսական եւ համակարգային ճգնաժամն էլ ավելի չխորացնել սեփական «մկանների» անհարկի ցուցադրմամբ»:
