![\"\"](\"https://www.aravot.am/2009/aravot_arm/July/24/p1-1.jpg\")
Առաջարկները, որոնք գտնվում են ղարաբաղյան հիմնախնդրի կարգավորման շուրջ բանակցությունների սեղանին, համապատասխանում են Ադրբեջանի դիրքորոշմանը, ըստ «Արմինֆո»-ի, հայտարարել է Ադրբեջանի նախագահ Իլհամ Ալիեւը 2009 թ. առաջին կիսամյակում երկրի սոցիալ-տնտեսական զարգացման արդյունքներին նվիրված կառավարության չորեքշաբթի օրը կայացած նիստում: Նրա խոսքով, Ադրբեջանի դիրքորոշումը միանշանակ է եւ անփոփոխ՝ հիմնված միջազգային իրավունքի նորմերի վրա: «Ադրբեջանի տարածքային ամբողջականությունը պետք է վերականգնվի, իսկ զավթված բոլոր հողերը ազատագրվեն օկուպանտներից: Նրանք, ովքեր բնակվում են Լեռնային Ղարաբաղում, եւ ադրբեջանցիները, ովքեր վերադառնալու են այնտեղ, պետք է ապրեն ինքնավարության պայմաններում»,- ասել է Ալիեւը: Նա նշել է նաեւ, որ «հաշտության համաձայնագիրն առաջին հերթին՝ պետք է արդարացի լինի, երկրորդ՝ հիմնված լինի միջազգային նորմերի վրա, իսկ Ադրբեջանի տարածքային ամբողջականությունը պետք է լիովին ապահովված լինի»: «Կարծում եմ, որ բանակցությունների սեղանին գտնվող առաջարկները թույլ կտան լուծել այդ հարցն իմ ասած ձեւով»,- ընդգծել է Ադրբեջանի նախագահը:
