Լեռնային Ղարաբաղի Հանրապետության (ԼՂՀ) յոթ քաղաքական կուսակցություններ երեկ հանդես են եկել համատեղ հայտարարությամբ, որում կոչ են արել «հարգել ԼՂՀ ժողովրդի ինքնորոշման իրավունքը»: Ինչպես հաղորդում է «Մեդիամաքս» գործակալությունը, հայտարարությունը ստորագրել են ԼՂՀ «Ազատ Հայրենիք», Ժողովրդավարական, «Արմենական», Կոմունիստական, «Դաշնակցություն», «Շարժում-88» եւ «Մեր տունը Հայաստանն է» կուսակցությունները: Հայտարարության մեջ, մասնավորապես, ասվում է, որ «ԼՂՀ-ի դուրս մղումը բանակցային գործընթացից, ինչպես նաեւ ԼՂՀ փաստացի պետականության անտեսումը եւ հակամարտության հանգուցալուծման նկատմամբ խտրական մոտեցումների դրսեւորումները ներկա փուլում ձախողման են դատապարտել ադրբեջանա-ղարաբաղյան հակամարտության կարգավորման ջանքերը»: Հայտարարության հեղինակները պահանջել են «հարգել ԼՂՀ ժողովրդի ինքնորոշման իրավունքը՝ ապահովելով ԼՂՀ լիիրավ մասնակցությունը կարգավորման գործընթացին, չխաթարել ԼՂՀ ժողովրդի անվտանգությունը, որի հիմնական երաշխիքը ԼՂՀ անկախ պետականությունն է եւ Սահմանադրությամբ ամրագրված տարածքային ամբողջականությունը»: Փաստաթղթում համոզմունք է արտահայտվում, որ նշված պահանջները չկատարելու դեպքում վտանգի է ենթարկվում մինչ այժմ խաղաղ պայմաններում ամրագրված ուժերի տարածաշրջանային հավասարակշռությունը, որի խախտման հետեւանքով ապագա ոչ ցանկալի զարգացման պատասխանատվությունն ընկնում է միջազգային հանրության եւ հատկապես ԵԱՀԿ Մինսկի խմբի համանախագահող երկրների ղեկավարության վրա:
