Կանադայի Հայ դատի հանձնախմբի նախկին գործադիր տնօրեն Արիս Պապիկյանը երեք տարի ժամկետով ընտրվել է քաղաքացիության հարցերով դատավոր: Այս մասին հայտնել է Կանադայի Քաղաքացիության, ներգաղթի եւ բազմամշակութայնության հարցերով նախարար Ջեյսոն Քենեյը, հաղորդում է «Նոյյան տապանը»: Նա կընդունի քաղաքացիությանը վերաբերող դիմումներին առնչվող որոշումներ, կկառավարի քաղաքացիական միջոցառումները եւ կկազմակերպի նոր քաղաքացիություն ստացողների երդման արարողությունը: Վերջին երկու տասնամյակների ընթացքում Ա.Պապիկյանը ներգրավված է եղել իր համայնքի ներգաղթի, քաղաքացիության, հասարակական ծառայությունների, մարդու իրավունքների եւ մշակութային հարցերի հետ կապված հիմնախնդիրների լուծման գործում եւ համարվում է կանադահայ համայնքի դեսպանը: Նա տիրապետում է հայերեն, անգլերեն, արաբերեն, թուրքերեն եւ հունարեն լեզուներին:
