Թուրքական էլեկտրոնային «Hurriyet» օրաթերթի տեղեկացմամբ՝ Թուրքիայում քննարկվում է, թե որ վայրն է նպատակահարմար հոկտեմբերի 14-ին Հայաստան-Թուրքիա ֆուտբոլային պատասխան հանդիպումն անցկացնելու համար: Նշվում է, որ սպասվում է հարցի վերաբերյալ Թուրքիայի նախագահ Աբդուլա Գյուլի եւ արտգործնախարարության վերջնական վճիռը: Ֆուտբոլային խաղի անցկացման թեկնածու վայրերից մեկը համարվում է Կայսերին:
Բույուքշեհիրի քաղաքապետ Մեհմեթ Օզհասեքին հանդես է եկել հայտարարությամբ. «Ըստ իս՝ այդ ֆուտբոլային հանդիպումը մեր քաղաքի մարզադաշտում կազմակերպելը ճանաչելիության առումով զգալիորեն նպաստավոր կլինի մեզ համար: Մեր հյուրերին էլ, ինչպես հարկն է, Անատոլիայի հյուրընկալության շրջանակներում կհարգենք ու կպատվենք»: Իսկ եթե որոշվի Հայաստան-Թուրքիա ֆուտբոլային հանդիպումը կազմակերպել մեկ այլ քաղաքում, ապա, Օզհասեքի հավաստմամբ՝ 32 հազար 500 տեղանոց «B.B. Kadir Has» մարզադաշտը կտրամադրվի Թուրքիա-Էստոնիա ֆուտբոլային հանդիպումն իրականացնելու համար: «Hurriyet»-ը նաեւ գրում է, որ «Turk Eqitim Sen 2 No\’lu» կազմակերպության Կայսերիի մասնաճյուղը ընդդիմացել է Հայաստան-Թուրքիա ֆուտբոլային հանդիպումը Կայսերիում կազմակերպելու գաղափարին եւ «Եղբայրներիս սպանողներին չեմ ուզում տեսնել մեր հողում» խորագրով արշավ ձեռնարկել»: Տեղեկացվում է, որ արդեն հավաքվել է 250 000 ստորագրություն, որը պատրաստվում են ուղարկել Թուրքիայի Ազգային մեծ ժողով:
