Երեկ «Սասունցի Դավիթ» կայարանում տեղի ունեցավ նոր, վերանորոգված «Արմենիա» գնացքի, այսպես ասած՝ «բացումը»: Երեւան-Բաթում գնացքն առաջին անգամ մեկնեց ժամը 22.30-ին: Երթուղին տեւում է 18 ժամ: Քանի որ դեռեւս ուղեւորների հոսքը մեծ չէ, ընդամենը 120 ուղեւորի համար նախատեսված վագոններ կշահագործվեն, իսկ ընդհանուր առմամբ գնացքը կարող է սպասարկել մոտ 350 ուղեւորի: Մեկ տոմսի արժեքը «կուպե» տեսակի 4 տեղանոց վագոնում 10 հազար 500 դրամ է, ավելի հարմարավետ երկտեղանոց վագոնում՝ 22 հազար դրամ, համեմատաբար մատչելի է «պլացկարտ» տեսակի վագոնի տոմսի արժեքը՝ 7000 դրամ:
Միջոցառմանը ներկա ՀՀ վարչապետ Տիգրան Սարգսյանը նշեց, որ «Հարավկովկասյան երկաթուղի» ՓԲԸ-ի հետ կնքված կոնցեսիոն պայմանագրի համաձայն, շուտով պետք է վերանորոգվեն շարքից դուրս եկած երկաթգծերը, հիմնական կայարանները եւ շոգեքարշների որակը պետք է բարձրացվի:
