Հարկային ծառայության ինտերնետ կայքում կարդում ենք. «Այսուհետեւ «շահում» են նաեւ չշահած կտրոնները. բոնուս՝ չշահած կտրոնների համար»:
Ըստ հարկային ծառայության՝ 2009 հուլիսի 1-ից սկսած, առաջին բոնուսներն են տրամադրվում չշահած ՀԴՄ կտրոններ ունեցող քաղաքացիներին: ՀՀ կառավարության որոշման համաձայն, ապրիլի 1-ից, յուրաքանչյուր եռամսյակի ընթացքում քաղաքացիների ձեռք բերած եւ վիճակահանության արդյունքում չշահած կտրոնների համար հաջորդ եռամսյակի ընթացքում կտրամադրվեն կատարած գնումների գումարի որոշակի տոկոս կամ այլ կերպ ասած՝ բոնուս: Հուլիսի 1-ից մինչեւ սեպտեմբերի 30-ը բոնուս կտրամադրվի ապրիլ, մայիս, հունիս ամիսների կտրոնների համար:
Իմանալով այդ մասին, որոշեցինք խմբագրության աշխատակիցներով հավաքել կտրոնները եւ ներկայացնել հարկային տեսչություն: Բայց երկար-բարակ հավաքելուց հետո հասկացանք, որ այդ բոնուսները շարքային քաղաքացիներիս համար չեն նախատեսված, քանի որ հավաքված կտրոնների քանակն ու դրանց ընդհանուր գումարը չհամապատասխանեց հարկայինի ներկայացրած պահանջներին: Գուցե հենց այդ հանգամանքը հաշվի առնելո՞վ է, որ Հարկային ծառայության կայքէջում շահում բառը վերցված է չակերտների մեջ…
Մեր կողմից առաջարկում ենք բոնուսների այլ տարբերակ. թող հարկայինը այդ բոնուսները միանգամից տրամադրի խոշոր հարկատուների ցուցակում, ասենք՝ 1-10-րդ տեղերը գրավողներին: Այս տարբերակն ունի մի քանի դրական կողմ: Նախ՝ ժողովուրդը, հատկապես՝ երեխաները, վաճառողների աչքին վատամարդ չեն դառնա, մարդիկ ավելորդ չեն լարվի, էլ չասենք հարկայինում ստեղծված իրարանցման մասին, ինչը խանգարում է եւ աշխատողներին, եւ հաճախորդներին:
