Բելգրադում ավարտվեցին 25-րդ համաշխարհային ուսանողական խաղերը, որի ծրագրում ընդգրկված 15 մարզաձեւերից Հայաստանի ուսանող մարզիկները մասնակցեցին չորսին՝ ձյուդո, թեքվանդո, սուսերամարտ, սեղանի թենիս:
Ունիվերսիադայում թեքվանդոյիստ, մինչեւ 78 կգ քաշային Արման Երեմյանի նվաճած բրոնզե պարգեւի մասին արդեն տեղեկացրել ենք:
Սերբիայի մայրաքաղաքում մեր թիմերից ավելի հաջող են հանդես եկել ձյուդոյիստները, որոնք Հայաստանի ընդհանուր թիմային հաշվարկին բերել են եւս մեկ բրոնզե եւ մեկ արծաթե մեդալ:
Մինչեւ 66 կգ քաշային Համբարձում Տոնոյանը տատամիում անցկացրել է հինգ գոտեմարտ: Նա հաղթել է Ալժիրի, Իրանի, Պորտուգալիայի, Սերբիայի իր մրցակիցներին եւ մտել եզրափակիչ, որտեղ, սակայն, զիջել է ճապոնացուն եւ բարձրացել պատվո պատվանդանի երկրորդ աստիճանին:
Արթուր Սրապյանը՝ մինչեւ 60 կգ քաշային կարգ, նախնական գոտեմարտերում պարտության է մատնել ավստրալացու, ֆիննի եւ ճապոնացու, սակայն եզրափակիչ անցնելու նրա ճանապարհը փակել է ղազախ ձյուդոյիստը, եւ հայ մարզիկը բավարարվել է բրոնզե մեդալով:
