![\"\"](\"https://www.aravot.am/2009/aravot_arm/July/14/p22.jpg\")
Միջին քաշային կարգում IBF-ի աշխարհի գործող, անպարտելի Արթուր Աբրահամը, որն այս քաշային կարգում անցկացրած 30 մենամարտերն էլ ավարտել է հաղթանակով (24-ը նոկաուտով), այդ ընթացքում 10 անգամ պաշտպանելով չեմպիոնական տիտղոսը, վերջնականապես որոշել է իր գահը թափուր թողնել եւ տեղափոխվել հաջորդ քաշային կարգ: Այս նորությունը IBF-ի ղեկավարությանը հայտնելու նպատակով նա մեկնել է Նյու Յորք, որտեղ գոտին անձամբ պետք է վերադարձներ այդ կազմակերպության ղեկավար տիկին Մարիան Մոհամմադին:
Իր այս որոշումն «Արքա Արթուրը» մեկնաբանում է այսպես. «Եկել է նոր բարձունքներ նվաճելու ժամանակը: Միջին քաշային կարգում ես ինձ ուրախ էի զգում: Բայց քանի որ Ֆելիքս Շտուրմն ու Կելլի Պավլիկը չեն ցանկանում հանդիպել ինձ հետ, պիտի շարունակեմ առաջ ընթանալ: Հիմա ցանկանում եմ լավագույնը դառնալ երկրորդ միջին քաշային կարգում: Վստահ եմ, որ այստեղ ինձ ավելի նշանակալի հաղթանակներ են սպասում»:
