Բրիտանիայում հրապարակվել են կառավարության մշակած կանոնները, որոնք կոչ են անում դպրոցներին ակտիվորեն պայքարել պարտադրված ամուսնությունների դեմ:
«Չկա այնպիսի մշակույթ եւ կրոն, որում պարտադրված ամուսնությունները պետք է հավանություն ստանան»,- հայտարարել է ԱԳ փոխնախարար Քրիս Բրայանթը: Նրա խոսքերով. «Ոմանք մտածում են, թե դա կապված է իսլամի հետ, սակայն այդպես չէ: Իսլամը խորհուրդ եւ հավանություն չի տալիս նման ամուսնությունների կնքմանը: Ցանկացած կրոնում ամուսնությունը պետք է լինի ազատ եւ կամավոր»,- նշել է փոխնախարարը: Նա նաեւ ասել է. «Դպրոցները պետք է շատ ուշադիր լինեն, հատկապես, եթե ընտանիքի ավագ զավակն ամուսնացել է շատ վաղ կամ հանկարծ դադարել է հաճախել պարապմունքների, եթե դեռահասը հակում ունի ֆիզիկական վնաս հասցնել ինքն իրեն կամ եթե նա ամբողջ ժամանակ ծնողների հետ է, ովքեր նրա հետ անգամ բժշկի են գնում»:
Ըստ պարտադրված ամուսնությունների դեմ պայքարի գծով բրիտանական դեպարտամենտի տեղեկատվության՝ փեսացուի կամ հարսնացուի կամքին հակառակ կնքված ամուսնական միությունների թիվը 2005 թվականից ի վեր եռապատկվել է: Այս տարի 770 մարդ է օգնության խնդրանքով դիմել դեպարտամենտ, ինչը 16%-ով ավելի է 2008 թվականի ցուցանիշից:
Կազմակերպությունում հաստատում են, որ խնդրի իրական մասշտաբն անհայտ է, շատ զոհեր գերադասում են չդիմել իշխանություններին: Պարտադրված ամուսնությունների դեմ պայքարի գծով բրիտանական դեպարտամենտի մասնագետները, ովքեր աշխատում են Բրիտանիայի ԱԳՆ-ի եւ ՆԳՆ-ի հսկողության ներքո, գտնում են, որ պարտադրված ամուսնությունների ընդհանուր թիվն անցյալ տարի հասել է հինգ հազարի:
Ըստ qahana.am-ի՝ Բրիտանիայում չկա պարտադրմամբ ամուսնություն կնքելու համար քրեական պատասխանատվություն նախատեսող օրենք:
Սակայն պարտադրման մեջ կասկածողների նկատմամբ կարող են կիրառվել բռնության, հափշտակման կամ գողության (եթե զոհից խլել են անձնագիրը) մասին օրենքներ:
