Զանգվածային լրատվամիջոցները տեղեկացնում են, որ Հայաստանի բռնցքամարտի ազգային հավաքականը մեկնել է Մախաչկալա, որտեղ կայանալու է միջազգային կարեւոր ներկայացուցչական մրցաշար:
Մեր ընտրանու կազմում են հիմնական կորիզից Հովհաննես Դանիելյանը՝ 48 կգ քաշային կարգ, Ազատ Հովհաննիսյանը՝ 57 կգ, Վլադիմիր Սարուխանյանը՝ 60 կգ, Էդիկ Համբարձումյանը՝ 64 կգ, Սամվել Մաթեւոսյանը՝ 69 կգ, Արթուր Խաչատրյանը՝ 71 կգ, եւ Մյասնիկ Սարգսյանը՝ 81 կգ:
Սա մեր հավաքականի համար սեպտեմբերի 1-13-ը Միլանում կայանալիք աշխարհի առաջնության նախապատրաստության վերջին կարեւոր փորձամրցումն է: «Ա1+»-ի ինտերնետային կայքը տեղեկացնում է, որ Մախաչկալայում մեր թիմի հետ չեն լինելու 75 կգ քաշային Անդրանիկ Հակոբյանը եւ Ցոլակ Անանիկյանը՝ 91 կգ քաշային կարգ, եւ ավելացնում, որ Անդրանիկ Հակոբյանը պետք է հանդես գար Հնդկաստանում հուլիսի 10-ին մեկնարկելիք միջազգային ներկայացուցչական մեկ այլ մրցաշարում, բայց քանի որ դրա կազմակերպման ժամկետները հետաձգվել են 10 օրով, Անդրանիկը հրաժարվել է մրցավայր մեկնել:
