Երեկ Կենտրոն եւ Նորք-Մարաշ համայնքների 1-ին ատյանի դատարանում ավարտվել է «Յոթի» գործից անջատված մասով ընթացող ՀՀՇ վարչության անդամ եւ Աբովյանի նախկին քաղաքապետ Գրիգոր Ոսկերչյանի դատավարությունը: Դատավոր Գագիկ Պողոսյանը երեկ հրապարակել է ՀՀ ՔՕ 225-ի 1-ին մասի հատկանիշներով՝ «զանգվածային անկարգություններ կազմակերպելու» մեջ ամբաստանվողի դատավճիռն ու որոշել նրան մեղավոր ճանաչել ոչ թե այդ, այլ ՀՀ ՔՕ 301-րդ հոդվածի հատկանիշներով՝ «Իշխանությունը զավթելուն, տարածքային ամբողջականությունը խախտելուն կամ սահմանադրական կարգը բռնի տապալելուն ուղղված հրապարակային կոչերը»:
Ըստ այդմ, Ոսկերչյանը դատապարտվել է 2 տարի ազատազրկման, նրա նկատմամբ կիրառվել է համաներում, եւ Գ. Ոսկերչյանն ազատ է արձակվել դատարանի դահլիճից:
