«Առավոտը» մի քանի անգամ գրել է Տավուշի մարզի Այգեհովիտ-Վազաշեն-Պառավաքար-Այգեպար ճանապարհի փլուզված հատվածի մասին: Մինչեւ հունիսի 20-22-ը այդ ճանապարհով դեռ մի կերպ երթեւեկում էին: Իսկ հիմա՝ ոչ, որովհետեւ սողանքի արդյունքում ամբողջությամբ է փլվել Այգեհովիտ-Վազաշեն-Պառավաքար-Այգեպար հանրապետական նշանակության ավտոճանապարհի 11-րդ կմ-ի երթեւեկամասը: Երեկ ՀՀ կառավարությունը որոշել է գումարներ հատկացնել «Այգեհովիտ-Վազաշեն-Պառավաքար-Այգեպար ճանապարհի 11-րդ կիլոմետրում առաջացած սողանքային հատվածի հետեւանքով կառուցվելիք ճանապարհը նախագծելու համար»:
Այս փլուզման արդյունքում Բերդ քաղաքը եւ հարակից գյուղերը կիսաշրջափակված վիճակում են, սակայն կառավարությունն առայժմ միայն ճանապարհը նախագծելու փողն է ճարել: Փոխարենը կառավարությունը իր պահուստային ֆոնդից 97 միլիոն դրամ տվեց Զորի Բալայանի շուրջերկրյա ճանապարհորդությանը, որը հաստատ պակաս կարեւոր է, քան սահմանամերձ բնակավայրերի ճանապարհների բարվոք վիճակը:
