Կմշակվի վնասակար նյութերի ազդեցության կրճատմանն ուղղված ազգային ռազմավարություն: Այս մասին հայտնում են Ազգային անվտանգության խորհրդի աշխատակազմի մամուլի ծառայությունից:
Հուլիսի 9-ին վնասակար նյութերի ազդեցության կրճատմանն ուղղված ազգային ռազմավարության մշակման աշխատանքային խումբը գումարել է անդրանիկ նիստը, որը վարել է Ազգային անվտանգության խորհրդի քարտուղար, Եվրոպական կառույցների հետ Հայաստանի համագործակցությունը համակարգող, միջգերատեսչական հանձնաժողովի նախագահ Արթուր Բաղդասարյանը: Ռազմավարության մշակումը նախատեսված է «Հայաստան-Եվրամիություն» 2009-2011 թվականների ծրագրով:
Ա. Բաղդասարյանը կարեւորել է մարդու առողջության եւ շրջակա միջավայրի վրա վնասակար նյութերի ներգործության ռիսկի նվազեցմանն ուղղված ջանքերը: Նիստում որոշվել է հնարավոր կարճ ժամկետներում՝ առկա եվրոպական լավագույն փորձի ուսումնասիրմամբ, մշակել հայեցակարգի նախագիծն ու դրանից բխող իրավական ակտերը եւ սահմանված կարգով ներկայացնել հաստատման:
