Հուլիսի 7-ին Լոս Անջելեսում Մայքլ Ջեքսոնի հոգեհանգստի արարողությունը դիտել են MSN կայքի երկու անգամ ավելի շատ այցելու, քան հունվարի 20-ին Բարաք Օբամայի երդմնակալությունը: Մինչդեռ CNN-ի կայքի այցելուները գերապատվությունը, այնուամենայնիվ, տվել են Օբամայի երդման արարողությանը: Փոփ-արքայի հոգեհանգիստը, կամ ավելի ճիշտ՝ հիշատակի համերգը, տեղի էր ունեցել Staples Center դահլիճում, որտեղ երգիչը փորձում էր «This Is It» ծրագիրը իր մահվանից մի քանի օր առաջ: Ոսկեզօծ դագաղը դրված էր նախաբեմում: Արարողությանը ներկա էին երաժիշտներ Մըրայա Քերին, Լայոնել Ռիչին, Սթիվի Ուանդերը, Աշերը, դերասանուհի Բրուք Շիլդսը եւ այլ աստղեր: Բացի այդ, իրենց կուռքին հրաժեշտ տալու հնարավորություն են ստացել երգչի 17,5 հազար երկրպագուներ, որոնք գրանցվել են Staples Center-ի կայքում: Ջեքսոնի հուղարկավորության վայրը եւ ժամը գաղտնի են պահվում: Մոտակա մեկ շաբաթվա ընթացքում հայտնի կդառնա նաեւ երգչի մահվան պաշտոնական վարկածը:
