Հայաստանի հայրենական ապրանք արտադրողների միությունը դիմել է կառավարությանը՝ արդյունաբերության եւ արտաքին առեւտրի նախարարություն ստեղծելու առաջարկով: Երեկ այս մասին լրագրողներին տեղեկացրեց միության նախագահ Վազգեն Սաֆարյանը: Նրա կարծիքով, այս քայլը կնպաստի հայկական արդյունաբերության խթանմանը: Բացի այդ, Վ. Սաֆարյանն ասաց նաեւ, որ իրենք դիմել են վարչապետին՝ հարկային վարչարարությունը մեղմացնելու առաջարկով: Միությունը որոշել է նաեւ չբավարարվել այսքանով եւ նոր ծրագրեր մշակել ու ներկայացնել կառավարությանը: Մասնավորապես՝ խոսքը փոքր ավիացիայի զարգացման ծրագրի մասին է: Ըստ Վ. Սաֆարյանի, Հայաստանը բավարար հնարավորություններ ունի փոքր ինքնաթիռների արտադրություն կազմակերպելու համար՝ սեփական օգտագործման եւ նաեւ արտահանման նպատակով: Վ. Սաֆարյանն առաջարկեց նաեւ, գյուղատնտեսությանը զարկ տալու համար, աճեցնել արեւածաղիկ, ճակնդեղ, գետնախնձոր, եգիպտացորեն եւ բուսական յուղի ու շաքարավազի արտադրություն կազմակերպել:
